វិលៗ មួយឆ្នាំបានកន្លងផុតទៅហើយ។ ខ្ញុំមិននឹកស្មានថាពេលវេលារត់យ៉ាងលឿនរបៀបនេះសោះ! ខ្ញុំសង្កេតឃើញថា៖ ខ្ញុំប្រើពេលកាន់តែច្រើនទៅៗលើអ៊ីនធឺណិត ជាពិសេស លើវិបសាយខ្មែរ។ ហេតុនេះហើយ ជីវិតខ្ញុំដូចជារស់នៅសង្គមពីរទន្ទឹងនឹងគ្នា៖ ខ្មែរនិងបារាំង។ ប្រហែលអញ្ចឹងហើយបានជាពេលវេលាឆ្លងទៅយ៉ាងរហាស់បែបនេះ ព្រោះដូចជារស់ពីរដង ដោយប្រើពេលតែម្ដង!
បើទោះបីជា ខ្ញុំមិនបានសរសេរអត្ថបទច្រើនដូចឆ្នាំទៅ ខ្ញុំក៏ឧស្សាហ៍ចូលមកលេងទីភូមិនេះដែរ។ មានអ្នកភូមិខ្លះបិតទ្វាចោល(ដូចខ្ញុំចឹង) មានអ្នកខ្លះដុតផ្ទះចោល(ហើយរត់ទៅនៅFacebook) តែដោយសំណាងនិងផលល្អ មានផ្ទះថ្មីៗកើតឡើងថែមទៀត ហើយមានម្ចាស់ផ្ទះក្នុងភូមិកសាងបង្កើតអត្ថបទយ៉ាងច្រើននិងសំខាន់ ដើម្បីចែករំលែកនិងបំភ្លឺគ្នា។ ម្យ៉ាងទៀត អ្នកភូមិជួយគ្នាដោយបញ្ចេញមតិដោយស្ថាបនា ចចែក ប្រកែកគ្នា រកការពិតនិងយុត្តិធម៌។ ខ្ញុំនៅឯនាយមានមោទនភាពលើកូនខ្មែរដែលខំព្យាយាមធ្វើរបៀបនេះ ដើម្បីបង្ហាញវត្តមានវប្បធម៌ខ្មែរលើអ៊ីនធឺណិត។ សម្រាប់ខ្ញុំ ការមកលេងនិងអានអត្ថបទសរសេរជាភាសាខ្មែរក៏ដូចជាការបៅដោះម្ដាយខ្ញុំដែលស្លាប់ទៅហើយ។ អក្សរពាក្យសព្ទខ្មែរក្លាយជាទឹកដោះចិញ្ចឹមអនុស្សាវរីយដ៏ឆ្ងាយមួយនៅក្នុងអារម្មណ៍ខ្ញុំ។
ឆ្នាំទៅ ខ្ញុំបានសរសេរ អត្ថបទលើបុណ្យប៉ាក
ឆ្នាំនេះ ខ្ញុំសូមជំរាបប្រាប់ថែមទៀតថា៖ ៤០ថ្ងៃបន្ទាប់ពីថ្ងៃបុណ្យប៉ាកគឺ ថ្ងៃបុណ្យAscensionដែលព្រះយេស៊ូឡើងទៅឋានព្រះអាទិទេព ហើយ១០ថ្ងៃថែមទៀតគឺ ថ្ងៃបុណ្យPentecôteនៃសាសនាជនជាតិជ្វីហ្វនិងគ្រិស្ត(remise des tables de la loi à Moïse ឬ descente de l’Esprit-Saint sur les apôtres)។
ម្សិលមិញ ថ្ងៃប៉ាក មានធ្លាក់ព្រិលផង មានរស្មីព្រះអាទិត្យផង មានពពកផង ធាតុអាកាសត្រជាក់ល្មម តែទេសភាពដូចជាចំឡែកពិបាកនិយាយ។ ខាងក្រោមនេះជារូបសត្វចៀម ទន្សាយ…ដែលធ្វើពីសូកូឡា៖
ហើយខាងក្រោមនេះជារូបអនុស្សាវរីយទៅលេងជិះស្គីពីរបីសបា្ដហ៍មុន៖
ខ្ញុំសូមឆ្លៀតឱកាសនេះ ដើម្បីជូនពរ ទៅ គ្រួសារ មិត្តភក្ដិ បងប្អូនកូនខ្មែរទាំងអស់ អោយទទួលនូវសុភមង្គលនិងសុខសន្តិភាព គ្រប់បែបគ្រប់យ៉ាង នៅឆ្នាំ២៥៥៦នេះ!
បើមានការខុសឆ្គង សូមអភ័យទោសអោយជាមុនផង។
ដោយនឹករលឹក ស្រឡាញ់និងគោរព ពីបងហង្ស
